ماهو بكفو الوقت حبك يمحيه ...... يالي تخاف صروف الايام تمحاه
ارتاح دام ان المواصل يقويه ...... انت انت وانا انا وقلبي هوا ياه
حتى ولو بتغيب ذكراك تكفيه ...... يا واحدِ تكفي عن الناس ذكراه
حبك على رملة خفوقي مواطيه ...... ورياح عذلي عنك ما تمسح خطاه
واللي يعذل القلب عن درب غاليه ...... الله بما يبلا المواليف يبلاه
اخفيه يابالفيت والحال يبديه..... ادناة واحد ينظر الحال يقراه
مخفيه فيه ومعتني به وحاميه ...... عن كل عين ودها تنزل حماه
قلبٍ يحبك والهوى الذرب ماليه...... كانك مكذبني بعينك تحلاه
شرطٍ تشوفك فيه منت بحواليه....... ويمكن تشوف ديار واماكن رعاه
وتشوف به تمثال والوقت هاريه...... وبتشوف زرعٍ ميت وواقف ماه
وبتشوف جرحٍ فيه سكين راعيه ...... راح ونسى السكين والجرح ينخاه
وبتشوف حصنٍ عج الاقدار سافيه...... وبتشوف باقي بيت راعيه خلاه
لاتنزعج هذا خفوقي وباقيه ....... ولا تضايق من تصدع زواياه
قد زلزله فرقا وهزت عراويه....... والله ستر والحظ عانه وعافاه
و كانه صلح لك واعجبك وزيد تبنيه ...... ابنه وجهز للمقابيل مبناه
ابغيك بس من المفارق تداريه ...... واذهل من يداري شعورك ويدراه
وحلل وحرم فيه يبرك بلاويه ....... وحله وراعي رضاي ورضاك ورضاه
جعلك بعد بعض الوجيه امحق وجيه .... ناسٍ مراتعها الرفيق بتقفاه
انوع واخطر نوع مااني بناسيه.... نوعٍ على تفريق الاثنين مسعاه
تلقاه دوم وكل يومٍ تلاقيه..... والى بغيت الصدق ما عاد تلقاه
ولا انت كل ما ادعيك لبيه....... انا اشهد ان مانتو بفيعيني اشباه
منت بمع العالم ولا تقول لي ليه...... انت ادرا مني وش جوابي وفحواه
كذيه ومن الله يازين واليه....... واغلا طروش القلب ودواه من داه
الحلم ياتيني بزولك واراعيه........ وفي كل حلم اقوم قبل اتحفاه
واعشق سميك في البزارين وادعيه..... واقبل خطاه لاخطى واتلاقاه
واسمك يروعني الى مر طاريه........ واحب ملقوفٍ يسولف وطراه
وامر بيتك من بعيدٍ ولا جيه...... وانا لونه في يدي ما اتعداه
حتى تواير موتري تلتفت فيه....... تبغى تلف ويستحي العقل والجاه
وصلك يخيط الصدر والبعد يفريه...... ويا بري حالي كان صديت برياه
ويلي على ادري حبنا ويش تاليه...... ويلي على ادري وش وراى الغيب ويلاه
عىشان اشوف اذا محبتك ترفيه......والله لقفي عنك واستغفر الله
الأحد أكتوبر 10 2010, 06:49
